«معمعة ذاتي»

عبداللطيف بن عبدالله آل الشيخ
الرياض

أمدّ روحي ذرا .. للي شكى همَّه
و انسى مع جروحهم .. سطوة معاناتي

تنصاني الناس .. لا صَكَّت بهم غمًّه
و اصير عون و سند .. في كل حالاتي

لكن .. ليا جيت بين النور و الظلمَه
تطيح ذيك المتون .. و يبتدي شتاتي

أروّض الصوت .. لا يتحشرج بـ تُهمَه
و اخبّي بـ «يا هلا» .. نَزْف انكساراتي

أخاف من عين تلمح .. ما ورا الكلمَه
أو ينقرا الحزن .. فيما بين ضحكاتي

أقول «إبشر» .. و انا اللي فاقدٍ حِلمَه
أنا الطريق الذي ضاعت مسافاتي

و اشتاق للّي قرتني .. بـ وحشة العتمَه
تِعْرِف خفايا الصَّدْر .. من صمت آهاتي

من قبل اسولف .. تمدّ لضيقتي بسمَه
و تغسل شحوب التعب .. في زيف نظراتي

تسأل: «تعبت؟» و أنا بي من الحكي زحمه
«لا يا بعدهم» أبد .. و استحلف سكاتي

و اليوم .. جفّ الحنان و ما بقى رحمَه
يا ليت ترجع .. و تستر خافي عثراتي

أردّد اسمك .. بصوتي و مسمعي يضمَّه
احتاجك انتي معي لآخر بداياتي

أنا لـ كِلّ البشر .. عزوه و لك يمَّه
أرجع «طِفِل» لجل اوازن معمعة ذاتي