ليش خايف ؟!

ليش خايف ؟!

عبداللطيف بن عبدالله آل الشيخ
الرياض

ليش خايف؟! و العدم ماله يِدين
إِنت تصنع من خضوعك له مقام

تدفن الخطوه بـ درب الخاضِعِين
تِحْسِب انّْ العَجْز يكفل لك سَلام

لو تطوِّل في وقوفك لحظتين
تكتشف إنّْ السلام .. اصله لجام

وقفتك تفضح يدين المنحنين
تغسل ذنوب الخناجر في الظلام

شِف بقايا الحزن فِي رواق الأنِين
إطرده .. و الدمع ما يبني خيام

إِكْسِر اصنام التردد .. لا تِلِين
رجفة الرهبه .. على مثلك حرام

شِقّ ثوب الزيف .. عن وجه اليقين
وِ اترك الراكع .. يعانق إنهزام

الكرامه .. مَا تنفس مرتين
فِي صدورٍ تحسب القِيد الوسام

ليش خايف .. تاقف بْـ وجه السنين؟
القيامه .. إسمها: (يوم القِيَام)!

ليش خايف .. ترفع الراس الدفين؟
الرقاب اللِّي انحنت .. غِمْد الحسام