إخو نوره

«إخو نوره»
عبداللطيف بن عبدالله آل الشيخ 
الرياض
حِنَّا ولِدنا في رَغَدْ خير و آمان
حب الوطن يفرض علينا شْعُورَه

و هو انولد في معمعة خوف و اشجان
صدرٍ يْلَمْلِمْ من شتاته كسوره

ما بين هَالْقَوْلَيْن عمرٍ مَلَى ازمان
شال امِّةٍ فاضت بهيبة حضوره

ما كانت البيدا مثل شوق ولهان
تنطر قدومه هَانْيَهْ في حبوره

كان الخطر في شعاب و الخوف وديان
والكل ساهر ما يفارق ثْغُوره

لم الشتات اللي مزج حقد و اضغان
وطفى لهيب الشَّر و اجتث جوره

تصير دار .. ويامن بكل الاحيان
عابر سبيلٍ ما يخاف الخطوره

والطفل يكبر له أماني و عنوان
أبعد من حدود القبيله و سوره

«عبدالعزيز» اللي بنى ساس و اركان
الحكم حكمه صار و الشور شوره

صيحة «اخو نوره» عزاوي لفرسان
نخوة هل العوجا و  صفوة صقوره

شال اسم اخته عز .. و القلب ميدان
كُونٍ يوسّع للخلايق صْدُوره

خَذْ من حمى بيته مفاهيم الانسان 
لين اصبحت كل البلاد مْعَمُوُرَهْ

تأمل بوجهه تشوف الدهر بان
تلقى مسافة بين همّه و سروره

نقرا حديث الوحده بأطهر لسان
في كتاب مجدٍ ساهرات سطوره

خَطَّتْ يِمِينِهْ كِلّ حَرْفٍ بِالْأَثْمَانْ
مِنْ عمْرَه اللِّي ساق دمه مْهُورَه

يوم اقتسام القاع في كل الاوطان
جمع شتات الأرض وارسى جُذُورَهْ

خلى اختلاف الناس نبتٍ ببستان
كل على طبعه يعطِّر عبوره

نفرق بكل انساب و افكار و الوان
إلا على «اسم المملكه» يا «آخو نوره»!

#اليوم_الوطني_السعودي_٩٦ 

#عزّنا_بطبعنا