حداد

حداد

عبداللطيف بن عبدالله آل الشيخ
حداد .. حداد .. حداد ..
ثوبٍ تحداه السواد
حداد..
وبنية تبكي .. 
بدموعها شرقا
أجساد ..
مزروعة فقبور ..
وارواحها ترقا..
واللي تقضب بالحبل ..
كانت يده عرقا ..
كانت يده عرقا
و كلٍ تحداه السواد.. 
كلٍ تحداه السواد..
إلا السما الزرقا.

(٢)
وجيه كاسيها الشحوب ..
و يتيمةٍ باحزانها غرقا ..
كلٍ يعزيها و يروح ..
و احزانها تبقى ..
وما احدٍ يقاسمها الحزن..
إلا الحزن وصمت الطريق..
يوم أنها مدت جسور بصوتها..
وتلفت.. 
تبي الطريق اللي يوصلَّها لها..!!
صاحت.. 
و ما احدٍ سمع لصياحها..
حتى الطريق .. 
حتى الطريق..!!
يااللي تلحفتي الظلام ..
و نمتي بعيون الحزن
مقتول فـ عيونك كلام ..
مشنوق في عمرك زمن
و الدمع زادك.. 
و العتاد..
دام السما زرقا.

(٣)
حياتنا.. 
صفحات سودا..
و الموت شامه من بياض
صدقٍ تدارا .. 
ثم فاض
و ما كان قبله من فرح ..
ما كان قبله من حزن ..
ما كان قبله من غضب ..
كله كذب.. 
كله كذب..
كله كذب 
الموت هو هذا الجِواد ..
ما قد رجع اللي امتطاه ..
إن هو رضى .. 
أو ما رضى ..
ماله سواه .. 
ماله سواه
و كلٍ في هالدنيا مداد ..
يِطوَى و يغتاله سواد ..
و تبقى السما .. 
زرقا.

(٤)

يا سيّدي الموت .. 
يا سيّدي الموت .. 
يا سيّدي الموت 
كم مرةٍ صحنا في وجهك..؟!
و ما قد نفعنا الصوت
يا سيدي الموت ..
نبي الحياة .. 
نبي الكذب .. 
و بيت بناه العنكبوت
يا سيدي الموت ..
لو الصدق يشرب ملامحنا ..
كان أقول ..
خل الحزن في أرضنا ..
لجل الفرح فيها يبان
خل الوجل فـ نفوسنا ..
يوازن الإنسان
خل الذنوب فـ ارقابنا ..
يغتالها الغفران
يا سيدي الموت ..
حنا ترى أحفاد .. 
و اللي بيجي أحفاد ..
و اللي بيموت أحفاد ..
حداد ..
و حفيدتي تبكي ..
و تنسى ..
دام السما زرقا.